𝐌𝐈𝐒𝐀 𝐒𝐄𝐌𝐀𝐍𝐀 𝐎𝐒𝐄𝐀𝐍𝐔 𝟐𝟎𝟐𝟓 𝐈𝐇𝐀 𝐒𝐎𝐋𝐄𝐍𝐈𝐃𝐀𝐃𝐄 𝐏𝐄𝐍𝐓𝐄𝐊𝐎𝐒𝐓𝐄

DILI, 08 Juñu 2025
Governu liu-hosi Ministériu Turizmu no Ambiente (MTA) hamutuk ho Gabinete Fronteiras Terrestres no Marítimas (GFTM) organiza misa agradesimentu bá Semana Mundiál Oseanu 2025, iha Igreja Parókia Imaculada da Conceição Sé-Catedrál, domingu (08/06/2025).
Misa ne’e prezide hosi Padre Aniceto Maia da Costa ho konselebrante Pároku Catedrál Padre Paulus Maia no misa ne’e koenside ho Selebrasaun Solenidade Pentekoste nian ne’ebé Primeira Leitura foti hosi Act.2,1-11, Segunda Leitura 1Cor.12:3b-7.12-13 no Evanjellu Saun João 20:19-23.
Padre Aniceto Maia da Costa iha omilia hateten, Leitura sira Jesus ko’alia kona-bá dame, perdaun, bensaun, rekonsiliasaun, transformasaun no unidade.
Iha Pentekoste, disípulu sira tauk, mo’e no laiha serteza kona-bá saida mak sei mosu, sira halibur-an iha kuartu ida hodi taka-an metin. Iha momentu ne’ebá Jesus mai la’ós kondena sira, la’ós kastigu sira maibé mai ho dame hodi dehan “𝐝𝐚𝐦𝐞 𝐡𝐞𝐥𝐚 𝐡𝐨 𝐢𝐦𝐢”.
Jesus hu-iis bá disípulu sira dehan, “𝐒𝐢𝐦𝐮 𝐄𝐬𝐩𝐢́𝐫𝐢𝐭𝐮 𝐒𝐚𝐧𝐭𝐮” signifika, ema labele moris iha tauk nia laran, tanba Espiritu Santu la’ós Espiritu tauk nian, maibé aten brani no misaun.
Espíritu Santu liberta ema hosi kuartu ne’ebé taka metin, liberta ema hosi arogánsia, hosi laran moras, hosi hahalok aat sira atu fahe domin bá ema seluk.
Tanba ne’e maka Jesus konvida atu bainhira perdua ema ida nia salan, ema ne‘e sei hetan perdaun no Igreja nia misaun atu fó perdaun.
Espiritu Santu tun bá ema atu sai instrumentu rekonsiliasaun iha família, Parókia, iha komunidade no mundu.
Leitura sira mós konvida ema atu loke fuan hodi sai horik fatin bá Espiritu Santu, nune’e bele hili no deside ida ne‘ebé mak loos. Buat loos sai bensaun bá ema seluk no labele husik atu domina tuir isin nia hakarak ne’ebé ikus-mai sai venenu bá ema seluk.
Espíritu Santu lori transformasaun ne’ebé ezije sakrifísiu. “𝐇𝐚𝐧𝐞𝐬𝐚𝐧 𝐦𝐨́𝐬 𝐚𝐠𝐨𝐫𝐚 𝐝𝐚𝐮𝐝𝐚𝐮𝐧 𝐆𝐨𝐯𝐞𝐫𝐧𝐮 𝐞𝐬𝐟𝐨𝐫𝐬𝐮 𝐡𝐞𝐥𝐚 𝐚𝐭𝐮 𝐡𝐚𝐝𝐢’𝐚 𝐬𝐢𝐝𝐚𝐝𝐞. 𝐋𝐨𝐤𝐞 𝐥𝐮’𝐚𝐧 𝐞𝐬𝐭𝐫𝐚𝐝𝐚 𝐧𝐞’𝐞𝐛𝐞́ 𝐩𝐫𝐞𝐬𝐢𝐳𝐚 𝐬𝐚𝐤𝐫𝐢𝐟𝐢𝐬𝐢𝐮. 𝐒𝐞 𝐡𝐚𝐤𝐚𝐫𝐚𝐤 𝐡𝐚𝐫𝐞𝐞 𝐬𝐢𝐝𝐚𝐝𝐞 𝐧𝐢𝐚 𝐟𝐮𝐫𝐚𝐤 𝐭𝐞𝐧𝐤𝐞 𝐬𝐚𝐤𝐫𝐢𝐟𝐢𝐤𝐚-𝐚𝐧. 𝐋𝐚𝐢𝐡𝐚 𝐭𝐫𝐚𝐧𝐬𝐟𝐨𝐫𝐦𝐚𝐬𝐚𝐮𝐧 𝐬𝐞𝐦 𝐬𝐚𝐤𝐫𝐢𝐟𝐢́𝐬𝐢𝐮,” Padre Aniceto hateten.
Ezemplu, kadeira ida kapaas tebtebes mai-hosi ai-hun bo‘ot ida. Bada’en ida transforma kadeira ne‘e hosi ai-hun boot ne‘e hahú hosi ko’a, tesi, sapila, prega to‘o sai tiha kadeira ida furak.
Leitura sira mós ko’alia kona-bá Unidade iha diversidade. São Paulo dehan ema hotu-hotu iha profisaun ne’ebé la hanesan, maibé kompleta malu. Tanba ne’e maka unidade iha sosiedade ne’e importante atu servisu hamutuk hodi lori rai ne’e bá oin.
Iha tinan 1992 liu-hosi Simeira iha Rio de Janeiro, deside hodi selebra loron mundiál Oseanu nian tanba Oseanu engloba dois tersu hosi mundu tomak ho nia produsaun oksijéniu 50% bá ema nia moris.
Ohin Santa Kreda selebra loron Espíritu Santu nian ho Loron mundiál Oseanu tanba iha ligasaun ne’ebé metin tebes. Bainhira laiha Espiritu Santu, ema labele moris. Nune’e mós bainhira laiha oksijéniu maka ema labele moris.
“𝐈𝐭𝐚 𝐡𝐞’𝐢𝐧 𝐤𝐚𝐭𝐚𝐤, 𝐡𝐨 𝐄𝐬𝐩𝐢́𝐫𝐢𝐭𝐮 𝐒𝐚𝐧𝐭𝐮 𝐧𝐢𝐚 𝐭𝐮𝐥𝐮𝐧 𝐢𝐭𝐚 𝐬𝐞𝐢 𝐧𝐚𝐤𝐥𝐨𝐤𝐞 𝐥𝐢𝐮-𝐭𝐚́𝐧 𝐚𝐭𝐮 𝐡𝐚𝐝𝐨𝐦𝐢 𝐢𝐭𝐚-𝐧𝐢𝐚 𝐭𝐚𝐬𝐢, 𝐥𝐢𝐮-𝐥𝐢𝐮 𝐥𝐚𝐛𝐞𝐥𝐞 𝐬𝐨’𝐞 𝐩𝐥𝐚́𝐬𝐭𝐢𝐤𝐮 𝐚𝐫𝐛𝐢𝐫𝐮 𝐧𝐨 𝐩𝐫𝐨𝐭𝐞𝐣𝐞 𝐚𝐭𝐮 𝐠𝐚𝐫𝐚𝐧𝐭𝐞 𝐬𝐮𝐬𝐭𝐞𝐧𝐭𝐚𝐛𝐢𝐥𝐢𝐝𝐚𝐝𝐞 𝐢𝐭𝐚-𝐧𝐢𝐚 𝐨𝐬𝐞𝐚𝐧𝐮 𝐢𝐡𝐚 𝐟𝐮𝐭𝐮𝐫𝐮,” bibi-atan ne’e hateten.
Semana Mundiál Oseanu 2025 konklui ho Feira Turizmu Mariñu Ekonomia Azúl iha loron 08 Juñu, iha Sentru Konvensaun Díli ne’ebé hatudu divertimentu no barraka sira hosi parte interesada no emprezáriu lokál ne’ebé involve iha seitór turizmu mariñu iha Timor-Leste.
Atividade sira ne’e nakloke bá públiku no dezeña atu involve eskola sira, foin-sa’e, autoridade lokál, sosiedade sivíl, parseiru dezenvolvimentu, setór privadu no públiku ein-jerál.
Misa agradesimentu ne’e partisipa hosi Prezidente Parlamentu Nasionál (PN), Maria Fernanda Lay, Prezidente Tribunál Rekursu, Afonso Carmona, Primeiru-Ministru (PM), Kay Rala Xanana Gusmão, membru Parlamentu Nasionál, membru Governu sira no mós funsionáriu sira.

link facebook (Média-GPM)