𝐊𝐎𝐍𝐅𝐄𝐑𝐄́𝐍𝐒𝐈𝐀 𝐀𝐏𝐂𝐂 𝐁𝐀́ 𝐃𝐀𝐋𝐀-𝐇𝐀𝐀𝐓, 𝐇𝐀𝐋𝐈𝐁𝐔𝐑-𝐌𝐀𝐋𝐔 𝐇𝐎𝐃𝐈 𝐊𝐎𝐍𝐓𝐀 𝐈𝐒𝐓𝐎́𝐑𝐈𝐀 𝐊𝐎𝐌𝐔́𝐍 𝐇𝐎 𝐎𝐑𝐆𝐔𝐋𝐋𝐔

DILI, 27 Juñu 2025
Prezidente Repúblika (PR), José Ramos-Horta konsidera Konferénsia Komunidade Luzo-Aziátika (APCC) bá dala-haat iha Díli, nu’udár momentu importante atu halibur-malu hanesan família ida hodi konta istória komún ho orgullu.
Prezidente Repúblika hateten iha diskursu abertura bá Konferénsia APCC iha CCD Díli, sesta (27/06/2025).
Xefe Estadu sente onradu no alegria tebes hodi loke Konferénsia ne’e no ho liman rua simu komunidade luzófona ne’ebé mai-hosi Ázia tomak lori algeria bo’ot ida no esperansa.
“𝐇𝐚𝐬𝐨𝐫𝐮-𝐦𝐚𝐥𝐮 𝐢𝐝𝐚-𝐧𝐞’𝐞 𝐥𝐚’𝐨́𝐬 𝐤𝐨𝐧𝐟𝐞𝐫𝐞́𝐧𝐬𝐢𝐚 𝐝𝐞’𝐢𝐭 𝐦𝐚𝐢𝐛𝐞́ 𝐢𝐭𝐚 𝐡𝐚𝐥𝐢𝐛𝐮𝐫-𝐦𝐚𝐥𝐮 𝐧𝐮’𝐮𝐝𝐚́𝐫 𝐟𝐚𝐦𝐢́𝐥𝐢𝐚 𝐢𝐝𝐚. 𝐇𝐚𝐧𝐞𝐬𝐚𝐧 𝐦𝐨𝐦𝐞𝐧𝐭𝐮 𝐢𝐝𝐚 𝐚𝐭𝐮 𝐫𝐞𝐟𝐥𝐞𝐭𝐞 𝐤𝐨𝐧𝐚-𝐛𝐚́ 𝐢𝐭𝐚-𝐧𝐢𝐚 𝐢𝐬𝐭𝐨́𝐫𝐢𝐚 𝐤𝐨𝐦𝐮́𝐧, 𝐟𝐨𝐫𝐭𝐚𝐥𝐞𝐬𝐞 𝐢𝐭𝐚-𝐧𝐢𝐚 𝐥𝐚𝐬𝐮 𝐬𝐢𝐫𝐚 𝐛𝐚́ 𝐬𝐨𝐥𝐢𝐝𝐚𝐫𝐢𝐞𝐝𝐚𝐝𝐞 𝐧𝐨 𝐤𝐨𝐧𝐭𝐚 𝐢𝐭𝐚-𝐧𝐢𝐚 𝐢𝐬𝐭𝐨́𝐫𝐢𝐚 𝐬𝐢𝐫𝐚 𝐡𝐨 𝐨𝐫𝐠𝐮𝐥𝐥𝐮 𝐧𝐨 𝐨𝐧𝐞𝐬𝐭𝐮, 𝐡𝐨𝐝𝐢 𝐡𝐚𝐭𝐞𝐤𝐞 𝐛𝐚́ 𝐟𝐮𝐭𝐮𝐫𝐮 𝐢𝐝𝐚 𝐧𝐞’𝐞𝐛𝐞́ 𝐤𝐨𝐧𝐬𝐭𝐫𝐮𝐢́𝐝𝐮 𝐢𝐡𝐚 𝐛𝐚𝐳𝐞 𝐚𝐦𝐢𝐳𝐚𝐝𝐞, 𝐫𝐞𝐬𝐩𝐞𝐢𝐭𝐮 𝐧𝐨 𝐢𝐡𝐚 𝐫𝐞𝐧𝐨𝐯𝐚𝐬𝐚𝐮𝐧. 𝐎𝐛𝐫𝐢𝐠𝐚𝐝𝐮 𝐛𝐚́ 𝐡𝐨𝐭𝐮-𝐡𝐨𝐭𝐮 𝐢𝐡𝐚 𝐯𝐢𝐚𝐣𝐞𝐧 𝐢𝐝𝐚-𝐧𝐞’𝐞,” Ramos-Horta hateten.
Eventu kulturál rejionál importante ne’e selebra legadu duradouru eransa portugueza iha Ázia tomak.
Konferénsia bienál ne’e ho durasaun loron tolu, hahú hosi 27-29 fulan juñu 2025 organiza hosi IX Governu Konstitusionál Timor-Leste nian, parseria ho Comunidade dos Países de Língua Portuguesa (CPLP).
Tema Konferénsia APCC bá dala-haat iha tinan 2025 maka “Unidu iha Diversidade: Dezafiu no Oportunidade hosi Legadu Sekulár”.
Primeiru-Ministru (PM), Kay Rala Xanana Gusmão hato’o mós boas-vindas mai Timor-Leste (TL) bá grupu sira ne’ebé reprezenta Komunidade Portugueza hosi Malaca (Malázia), Burghers Portuguezes hosi Batticaloa (Sri Lanka), Bayingyis hosi Vale Mu (Mianmar), Paróquia sira hosi Conceição, Sta. Cruz no Nossa Senhora do Rosário (Tailândia), Macau (China), Goa (Índia), Tugu Mardijkers hosi Jakarta no Larantuqueiros ka Topasses hosi illa Flores nian (Indonézia).
Konferênsia ne’e halibur mós akadémiku sira, investigadór sira, líder kulturál sira, artista no dignitáriu mai-hosi mundu luzófonu atu partilla resultadu hosi sira-nia estudu no diversas esperiénsias.
APCC orijinalmente funda iha Malaca, Malázia, iha tinan 2016 ho objetivu atu halibur komunidade sira ne’ebé to’o agora sei mantein eransa portugueza no lasu kulturál nian iha rejiaun aziátika tomak.
Antes ne’e Timor-Leste reprezenta hosi Ministru Planeamentu no Investimentu Estratéjeiku, Xanana Gusmão, ne’ebé partisipa nu’udár konvidadu onra no aproveita oportunidade atu dezafia organizadór sira atu konsidera possibilidade hodi akolla futura edisaun APCC iha Díli.
Programa APCC durante loron tolu ne’e inklui palestra, meza redonda, espozisaun kulturál, aprezentasaun akadémika, aprezentasaun kulinária no kulturál.
Iha mós marku importante hosi konferénsia ne’e tanba sei asina deklarasaun Dili, hodi formaliza kriasaun bá Associasaun Komunidade Portugueza iha Ázia (APCA), hanesan plataforma rejionál foun ida ne’ebé dedika bá kooperasaun kulturál, prezervasaun patrimóniu no partilla koñesimentu.
Primeira Konferênsia APCC realiza iha Malaca iha tinan 2016 ho objetivu atu estreita lasu sira, promove língua, kultura portugueza no insentiva kolaborasaun duradoura entre komunidade assendénsia portugueza iha Ázia.

LINK FACEBOOK (Média-GPM)